1

Páll og Silvanus og Tímóteus til safnaðar Þessaloníkumanna í Guði föður vorum og drotni Jesú Kristi.

² Náð sé með yður og friður frá Guði föður og drotni Jesú Kristi.

³ Skylt er oss bræður, að þakka ætíð Guði fyrir yður eins og maklegt er; því að trú yðar eykst stórum og kærleiki sérhvers yðar allra, hver til annars, fer vaxandi, ⁴ svo að vér sjálfir hrósum oss af yður í söfnuðum Guðs fyrir þolgæði yðar og trú í öllum ofsóknum yðar og þrengingum þeim, er þér þolið, ⁵ og er þetta augljóst merki um hinn réttláta dóm Guðs, til þess að þér skulið verða álitnir maklegir guðsríkis, sem þér nú einnig líðið ilt fyrir, ⁶ svo sannarlega sem það er rétt hjá Guði að endurgjalda þeim þrengingu, sem að yður þrengja, ⁷ en yður, sem þrenging líðið, hvíld með oss, þegar drottinn Jesús opinberast af himni með englum máttar síns, ⁸ í logandi eldi og lætur hegningu koma yfir þá, sem ekki þekkja Guð, og yfir þá, sem ekki hlýða fagnaðarerindi drottins vors Jesú, ⁹ því að þeir munu sæta hegningu, eilífri glötun, fjarri augliti drottins og fjarri dýrð máttar hans, ¹⁰ þá er hann kemur til að sýna sig dýrðlegan í sínum heilögu og dásamlegan í öllum, sem trúað hafa á þeim degi; því að vitnisburði vorum fyrir yður hefir verið trúað. ¹¹ Í þeim tilgangi biðjum vér og alla tíma fyrir yður, að Guð vor álíti yður maklega köllunarinnar og fullkomni kröftuglega hvers konar velþóknun á því, sem gott er, og verk trúarinnar, ¹² svo að nafn drottins vors Jesú verði dýrðlegt í yður og þér í honum eftir náð Guðs vors og drottins Jesú Krists.

2

En vér biðjum yður, bræður, að því er snertir tilkomu drottins vors Jesú Krists og samsöfnun vora til hans, ² að þér ekki séuð fljótir á að láta hræða yður eða trufla, hvorki af nokkurum anda né við orð eða bréf, sem væri það frá oss, eins og dagur drottins væri þegar fyrir höndum. ³ Látið engan villa yður á nokkurn hátt; því að ekki kemur hann, nema fráhvarfið komi fyrst og maður syndarinnar birtist, sonur glötunarinnar, ⁴ hann sem setur sig á móti og rís gegn öllu því, sem kallast Guð eða helgur dómur, svo að hann sezt í Guðs musteri og kemur fram eins og hann væri Guð. ⁵ Minnist þér ekki þess, að eg sagði yður þetta, meðan eg enn þá var hjá yður? ⁶ Og nú, þér vitið, hvað aftrar honum, til þess að hann opinberist á sínum tíma. ⁷ Því að leyndardómur lögleysisins er þegar starfandi, einungis að þeim, sem nú aftrar, verði burtu rýmt. ⁸ Og þá mun hinn löglausi opinberast — og honum mun drottinn Jesús tortíma með anda munns síns og að engu gjöra við opinberun tilkomu sinnar —, ⁹ en koma hans er fyrir framkvæmd Satans, með alls konar krafti og táknum og undrum lyginnar, ¹⁰ og með alls konar vélum ranglætisins fyrir þá, sem glatast, af því að þeir veittu ekki viðtöku kærleikanum til sannleikans, að þeir mættu verða hólpnir. ¹¹ Og þess vegna sendir Guð þeim megna villu, til þess að þeir trúi lyginni, ¹² til þess að allir þeir verði sakfeldir, sem ekki hafa trúað sannleikanum, en hafa haft velþóknun á ranglætinu.

¹³ En skylt er oss, að þakka ávalt Guði fyrir yður, bræður, elskaðir af drotni, að Guð hefir frá upphafi útvalið yður til frelsunar í helgun andans og trú á sannleikann, ¹⁴ og til þess kallaði hann yður fyrir fagnaðarboðskap vorn, að þér skylduð öðlast dýrð drottins vors Jesú Krists. ¹⁵ Bræður, standið því stöðugir og haldið fast við þá lærdóma, er yður hafa verið kendir, hvort sem það er munnlega eða með bréfi frá oss.

¹⁶ En sjálfur drottinn vor Jesús Kristur og Guð, faðir vor, sem elskaði oss og gaf oss í náð eilífa huggun og góða von, ¹⁷ huggi hjörtu yðar og styrki í sérhverju góðu verki og orði.

3

Að öðru leyti, bræður, biðjið fyrir oss, að orð drottins megi hafa framgang og vegsamast eins og hjá yður, ² og að vér mættum frelsast frá spiltum og vondum mönnum; því að ekki er trúin allra; ³ en trúr er drottinn, og hann mun styrkja yður og vernda fyrir hinu vonda. — ⁴ En vér höfum það traust til yðar í drotni, að þér bæði gjörið og munið gjöra það, sem vér leggjum fyrir. ⁵ En drottinn leiði hjörtu yðar til kærleika Guðs og þolgæðis Krists.

⁶ En vér bjóðum yður, bræður, í nafni drottins vors Jesú Krists, að þér sneiðið yður hjá hverjum þeim bróður, er framgengur óreglulega og ekki eftir þeim lærdómi, sem þeir hafa numið af oss. ⁷ Því að sjálfir vitið þér, hvernig á að breyta eftir oss, því að ekki hegðuðum vér oss óreglulega hjá yður, ⁸ neyttum ekki heldur brauðs hjá neinum fyrir ekkert, heldur unnum vér með erfiði og striti nótt og dag, til þess að vera ekki neinum yðar til þyngsla. ⁹ Ekki af því að vér ekki höfum rétt til þess, heldur til þess að vér gæfum yður sjálfa oss sem fyrirmynd, til að breyta eftir oss. ¹⁰ Því var og það, að þegar vér vorum hjá yður, buðum vér yður: Ef einhver vill ekki vinna, þá skal hann ekki fá að eta. ¹¹ En vér heyrum, að nokkurir meðal yðar framgangi óreglulega, sem ekkert vinna, heldur gefa sig alla við því, sem þeim kemur eigi við. ¹² Slíkum mönnum bjóðum vér og áminnum þá í drotni Jesú Kristi, að vinna kyrlátlega og eta sitt eigið brauð. ¹³ En þér, bræður, þreytist ekki gott að gjöra. ¹⁴ En ef einhver hlýðir ekki orðum vorum í bréfi þessu, þá merkið yður þann mann, að hafa ekkert samfélag við hann, til þess að hann blygðist sín; ¹⁵ en álítið hann þó ekki sem óvin, heldur áminnið hann sem bróður.

¹⁶ En sjálfur drottinn friðarins gefi yður friðinn, ætíð á allan hátt. Drottinn sé með yður öllum.

¹⁷ Kveðjan er með minni, Páls, eigin hendi, og það er merki á hverju bréfi. Þannig skrifa eg. ¹⁸ Náðin drottins vors Jesú Krists sé með yður öllum.