1

Páll, bandingi Krists Jesú, og bróðirinn Tímóteus til okkar elskaða Fílemons og samverkamanns okkar, ² og til Appíu systur okkar, og til Arkippusar samherja okkar, og til safnaðarins í húsi þínu.

³ Náð sé með yður og friður frá Guði föður vorum og drotni Jesú Kristi.

⁴ Guði mínum gjöri eg ávalt þakkir, er eg minnist þín í bænum mínum, — ⁵ er eg heyri um kærleika þinn og trúna, sem þú hefir til drottins Jesú og til allra hinna heilögu, — ⁶ að samfélag trúar þinnar verði mikilvirkt fyrir Krist í þekking alls hins góða, sem með yður býr. ⁷ Því að eg hlaut mikla gleði og huggun af kærleika þínum, þar eð þú, bróðir, hefir endurnært hjörtu hinna heilögu.

⁸ Því er það, að þótt eg hafi fulla djörfung að bjóða þér það sem vera ber, ⁹ þá fer eg þó heldur bónarveg vegna kærleika þíns, þar sem eg er eins og eg er, hann Páll gamli, og nú líka bandingi Krists Jesú; ¹⁰ eg bið þig þá fyrir barnið mitt, sem eg hefi getið í fjötrum mínum, hann Onesímus, ¹¹ sem áður var þér óþarfur, en er nú þarfur bæði þér og mér; ¹² einmitt hann sendi eg nú til þín aftur, og er hann hjartað í brjósti mér. ¹³ Feginn vildi eg hafa haldið honum hjá mér, til þess að hann í þinn stað veitti mér þjónustu í fjötrum fagnaðarerindisins; ¹⁴ en án þíns samþykkis vildi eg ekkert gjöra, til þess að velgjörningur þinn skyldi ekki koma eins og af nauðung, heldur af fúsum vilja. ¹⁵ Því að vísast hefir hann þess vegna um stundarsakir skilist við þig, til þess að þú síðan skyldir eilíflega halda honum; ¹⁶ ekki lengur eins og þræli, heldur þræli fremri, eins og elskuðum bróður, mjög kærum mér, en hve miklu fremur þó þér, bæði í holdi og í drotni. ¹⁷ Ef þú nú telur mig félagsbróður þinn, þá tak á móti honum, eins og væri eg það sjálfur. ¹⁸ En hafi hann eitthvað gjört á hluta þinn, eða sé hann í skuld við þig, þá fær þú mér það til reiknings. ¹⁹ Eg, Páll, rita með eigin hendi: Eg mun gjalda — að eg ekki nefni við þig, að þú enda ert í skuld við mig um sjálfan þig. ²⁰ Já, bróðir, unn mér gagns af þér í drotni, endurnær hjarta mitt í Kristi. ²¹ Í fullu trausti til hlýðni þinnar rita eg til þín, og veit að þú munt enda gjöra fram yfir það, sem eg mælist til. ²² En hafðu líka til gestaherbergi handa mér, því að eg vona, að eg vegna bæna yðar muni verða gefinn yður.

²³ Epafras, sambandingi minn í Kristi Jesú, sendir þér kveðju, ²⁴ og Markús, Aristarkus, Demas og Lúkas, samverkamenn mínir.

²⁵ Náðin drottins vors Jesú Krists sé með anda yðar. Amen.