Áður en hafist er handa við að búa til rafbók er rétt að athuga nokkur atriði. Rafbækur (t.d. EPUB og MOBI) byggjast á flæðandi texta sem aðlagast þeim skjá sem bókin er sýnd á. Það þýðir að ekki er hægt að stjórna því nákvæmlega hvernig textinn lítur út á skjánum. Það er því oft betra að hafa uppsetninguna einfalda og leyfa sjálfgefnum möguleikum rafbókalesara að ráða frekar. Þannig ætti ekki að tiltaka stafagerð eða leturstærð nema að takmörkuðu leyti. Það þýðir líka að betra er að hafa myndir á milli efnisgreina heldur en í þeim miðjum.

Það að búa til einfalda rafbók þarf ekki að vera mikið flóknara en að búa til Word skjal (sjá neðst).

Í forritinu Sigil (til fyrir Windows, Mac og Linux) er bæði hægt að breyta EPUB skjölum og skjölum sem byggja á html. Það er líka hægt að búa til bók frá grunni með því að skrifa eða líma þar inn texta.

Grunnskjöl bókarinnar sjást til vinstri í forritinu. Þar er bókinni skipt niður í hluta eftir röð. Ef þið viljið bæta við nýjum hluta í bókina veljið þið möppuna Text og smellið á hægri músahnappinn. Þá getið þið annað hvort valið að bæta við skjali sem þið eigið þegar til í tölvunni ykkar (Add Existing Items…) eða auðu skjali (Add New Item).

Ef þið viljið breyta röðinni á einstökum hlutum bókarinnar er hægt að draga þá til með músinni í Text möppunni.

Í Sigil þarf að passa sérstaklega vel upp á fyrirsagnir (headings).

Með fyrirsögnum er hægt að búa til efnisyfirlit, jafnvel lagskipt ef það hentar. Aðalkaflar ættu að vera merktir með Heading 1. Undirkaflar, ef þeir eru til staðar, ættu að vera merktir Heading 2. Það er hægt líka hægt að búa til þriðja lagið af köflum með Heading 3 og svo framvegis.

Það þarf líka að brjóta skjalið niður í hluta eftir kaflaskilum. Það er gert með því að fara í Insert og velja Chapter Break á eftir síðasta punktinu í kafla. Þetta er líka gert til að skilja síður í sundur, svo sem forsíðu eða titilsíðu.

Til þess að láta inn forsíðumynd (kápumynd) er smellt á Insert og valið Image…. Myndin þarf að vera í stærðinni 800×600. Forsíðan á að vera í fremst í fyrsta hluta bókarinnar.

Síðan þarf að merkja myndina sem kápumynd eins og sést hér.

Það er líka nauðsynlegt að setja inn lýsigögn þar sem grunnupplýsingar um rafbókina koma fram. Það er gert með því að fara í Tools og velja Meta Editor.

Þær grunnupplýsingar sem þurfa helst alltaf að tiltaka í lýsigögnum eru titill, höfundur og tungumál skjalsins. Hægt er að bæta við meiri upplýsingum, til dæmis ISBN tölu, með því að velja annað hvort Add Basic eða Add Adv..

Það þarf líka að búa til efnisyfirlit og það ætti alltaf að vera það síðasta sem er gert við tilbúna bók. Þá þarf að velja Generate TOC from headings neðst í hægra horninu. Þá opnast gluggi þar sem hægt er að velja hvaða kaflaheiti koma fram í efnisyfirlitinu.

Rafbókin er síðan vistuð sem EPUB skjal.

Ef það á að breyta bókinni í MOBI skjal sem hægt er að opna í Kindle er forritið Calibre notað.

Til að bæta nýrri bók í Calibre er annað hvort hægt að draga skjalið í glugga forritsins eða farið í Add books efst í vinstra horninu.

Til að breyta skjalinu er það valið og smellt á hægri músarhnapp. Þá kemur upp valmynd þar sem fyrst er valið Convert books og síðan Convert Individually.

Þá kemur upp gluggi með ýmsum möguleikum til að breyta skjalinu. Til að gera skjal sem hægt er að opna í Kindle skal velja MOBI í fellilistanum og smella síðan á OK.

Til þess að finna nýja skjalið er bókin valin í listanum og þá ætti eftirfarandi að sjást hægra megin á skjánum. Ef smell er á Click to open þá opnast mappa sem inniheldur allar gerðir af bókinni.

Nú ættirðu að eiga rafbók sem hægt er að opna í flestum rafbókalesurum.

Rafbók úr Wordskjali

Það er hægt að breyta góðu Word skjali í rafbók með tiltölulega lítilli fyrirhöfn og hjálp frá forritinu Sigil. Skjalið er þá fyrst vistað sem Web Page, Filtered í Word. Þá er gott að opna nýja skjalið í Notepad og afrita textann í síuna sem vefurinn Word Off býður upp á og líma nýja textann aftur í Notepad þar sem hann er vistaður. Þetta er gert til þess að hreinsa auka kóða úr skjalinu. Nýja skjalið er síðan opnað í Sigil. Þá er hægt að laga það til eftir leiðbeiningunum hér að ofan.